santali png photo

Add caption

কাঁহিস --দূরবীন সরেন

 কাঁহিস্

 দূরবীন সরেন

পেটেচ্ গুম খচ্ নে এয় হেচ্ এনা সাঁদারি। পেটেচ্ রেয়াঃ লুপুঃ বুড়িকো গটা হড়ম মেৎ আঁহারে বাঁইসাঁও আকাওয়াদেয়া। হুডিঞিচ্ কুড়ি গিদরৗ মালো দ সাদারিয় দুডুস্ এন সাঁওতে তোওয়ারেয় গের বিৎ এনা । জিরাউগে বানুঃ তায়া সাঁদারিয়াঃ। নতে বাহরেরে হুনৗর ইসিন অড়াঃরে হঁ সাহান, সাকাম, দাঃ লো, ঢাকা উত্তু, ইসিন বাসাং—সানাম আগে কামি হোয়ঃ তায়া। নতে খেচ্ খেচ্ গিদার পিদার, জুরি পারি হ মিৎ রগড় তেগেচ্ তৗগুম, ঠাপাঠঃ কিন তাঁহেনা। মনরে আঁড়ি কাঁহিসে বুঝৗওয়া , আর হুঁ নতে ঘারঞ্জ রেয়াঃ আথানথার জালাকার রেকিন উড়ুচ্ ডুবুজঃ কানা।

দিকু ঠেন কামি ভরসা জম। মিৎ দিন কামি বায় ঞাম লেকান চুলহৗরে সেঁগেল বাং জুলুঃআ। বরসা দিন হোড়ো রহয়— আঁঘাড় দিন হুড়ু ইর, আর সেতোং লল দিনমা হাঁ হাঁ উদুড় দুপুড় হাসা কৗমি। সেরমা রেয়াঃ অকা দিনগে জিরাউতে দ বাং বিতৗঃ কানা। চুপুৎ সুমুং জিউয়ী আর মিৎ বিৎতৗ লাচ্ লাগিৎ আঁড়ি কাইতুর কাতে মিমিৎ গটেচ্ দিন অক্তে পারম সেনঃ কানা। কৗমি দ একেন লাচ্‌ মত লৗগিৎ গে লাচ্ হুঁ বাং পেরেজঃ কানা। হড়ম দালপ্ মাথর আঁড়ি মুসকিল;এনকা অড়েচ্ কিচরিচ্ তেগে অক্তে লেখা লেখাতে পারম সেনঃ কানা সাঁদারি আর চৗম্পাই তীকিনাঃ জিয়ন নাউকৗ।

পাতা অক্ত সেটেরেনা। ঝেট বঁগা বুরু কুনৗমি হিলঃ সিরামপুরকো পাতায়েদা। আতো কড়া কুড়িকো দ মিৎ হাপতা লাহা খন কিচরিচ্ খান্ডৗয়ৗঃ, আঙ্গরপ্ এমানকো কিরিঞ বাড়া জং কানা। কুড়ি কড়া হাড়াম বুড়হি সানাম কওয়াঃ দিসৗ মেনাঃ তাকোওয়া সিরামপুর পাতা রেনাঃ। আর অনাতে আঁডি কো রাস্কৗ কানা। হেঁ, চেদাঃ হালে বাং, সাদ রেয়াঃ পাতা কান দ! – “হেঁদা মালো আপাত, আম দ সাড়ি দম কিরিঞৗঞৗ সে বাং? চেৎ হুঁ বাম রড় বাড়ায়েৎ?” সাঁদারি দ জাঁওয়ায়তেৎ চামপাই এ কুলি কেদেয়া।

—“ঞেলেৎ কান গে হানি কিসাড় পয়সা লাগিৎ ইঞ্ মেন আকা আদেয়া, ইমৗ কানায় সে বাং নাহাঃ।” চামপাই দয় রড় রুওয়াড় কেদা।

—“আম দ মিৎ পয়সা, তালা পয়সা, রামো রামো দহ দ বানুঃ তামা।” গারগাৎ সালাঃ সাদারি দয় মেন কেদা।

—“চেকায়াম এন্তেৎ, লাচ্ আঁসুলগে তিন জালা; আর হুঁ তালাং গিদার পিদার। চেকাতেলাং চেকায়া, আডি আসঃ টায়ঃ- গেঞ্ আটকারেৎ কানা।”

নেবরত সাতালাঃ চামপাই দয় মেনকেদা আর হাতে নাতে খন বুঝাউ আয় রেয়াঃ এ কুরুমুটু কেদা। সিরামপুর পাতা হিলোঃ আয়ুব দ কুড়ি কড়াকো গুবুড গুবুড লাঁগড়ে ঝে এনেচ্ কানা। আতো পরব লেকা আইকৗঃ কানা। সানাম হড়গে হাঁড়ি ঞ্ লেওয়া সাড়ে রাঁস্কৗকো উদুঃ এৎ কানা। সাঁদারি দ মিৎ টুকুচ্ গান-হঁ বায় দহ দাড়ে লেদা। জাগে জমবাড়া কাতেকো ঠাঁই বাড়ায়েনা। দিসৗ রাকাব্ দিসাঁ আঁড়গো কাতে সাঁদারিয়াঃ মনে জিউয়ী দ লঃকান তায়া মডঃ মডঃ।

সাঁদারি দ় গিদরৗ হাঁবুৎ কাতে কুসুৎ, কুসুৎ, সুরুচ্ সুরুচ্ এ রাঃ এৎ কানা। চামপাই দ সাঁদারিয়াঃ কেওয়া জটেৎ কাতে জহারে চঃ আয় তুলুচ্ এ মেতায় কানা,“এ দুলৗড় ! চেকায়েনাম? চেদাঃ এম রাঃ এদা?”

সাঁদৗরি দ মেৎ দাঃ জরঃ তুলুচ্ এ মেন কেদা, “চেদাঃ বাঞ রাগা এন্তে, চেদাঃ জিউয়ী দ বাংলঃ তিঞৗ। ইঞৗঃ দ পাতা ঞেল রেয়াঃ সাদ বানুঃ তিঞৗ? হড়বেন আয়োদ আকোরেন গিদার পিদারাতে পাতা ঞেঞেলকো সেনঃ আ আর ইঞ্দ...। আর হুঁ রারাঃ তুলুচ্ এ মেনকেদা—“হড় দকো রাস্তাঃ আ আর ইঞ দ রেঁগেচ্ জালাতে জিলুৎ মিলুৎ ইঞ বেঁগেৎ বাড়ায়া...হ……..…….উ..উ...উ।” আর ইঁ রাঃ এ সৗরদি কেদা।

—“আলোম রাগা দুলৗড়, আমাঃ রাঃ আর দুক আঁজম কাতে ইঞ্ হুঁ রারাঃ সানাঞ্ কানা! চেকায়াম এন্তে,আলাঙাঃ মলংগে নংকা তালাঙা। অকয় চেৎ লাং মেতা কওয়া। আলাং তেগে কুরুমুটু হোয়ঃ তালাঙা।”

জিউয়ী রাড়েচ এম তুলুচ্ চামপাই দ সাঁদারিয় বুঝৗউ আদেয়া।

সেতাঃ তরা কুড়ি কড়াকো দ ছিলকি বিলকি হানা অড়াঃ নাওয়া অড়াঃ বল ওডোং কাতে রঃ নাকিজঃ তেকো সাপড়াঃ কানা পাতা লে। মালো দওনকো ঞেলতে সাঁদারিয় মেতায় কানা—“এ গ আবো দ তিরেবন সাপ্‌ড়াঃ আ, মা গ ইঞ্ হুঁ নাকিজিঞ্ মে সুৎ কিঞ মে, দেলাবন সেন গদঃ আ।”

মালোওয়াঃ হোড়সো ঞেল কাতে সাদারিয়াঃ জিউয়ী দ আর হুঁ লয়েনা। হিডির হিডির মেৎ দাঃ জর ফেডেন তায়া। মেনকেদায়—চাঃবাঞ্ জাঁওয়ায়েন নংকান হেরেল রেদ। মালো দোগে তুলুচ্ এ মেতায় কানা—“এ মাই আবো দ পাতা ঞেল দ বাবোন সেনঃ আ। মামা তাকো ঠেন বোন সেনঃ আ। লাডু খৗজাড়ি, জিল দাকাকো এমাবোনা, মঁজগেবো জম জঙা নাহাঃ।”

মালো দয় বুলাউ গৎ এনা। হোড়সো দ চাবায়েন তায়া। কুড়ি কড়াকো দ জাঁক জমক সাপড়াও কাতে পাতা ঞেলকো ওডোং সেনঃ কানা। মালোওয়াঃ জিউয়ী মন দ ছাট পাটাঃ কানা। মালো এঁগাতাঃ হুঁ কড়াম সারেড় মন দুক দ সেরে সেরে, সেকে সেকে বাড়ায় কানা। পাতা ঞেঞেলকো ঞেলগৎ কাতেগে চামপাই আর সাঁদারি দ ঝুড়ি পাসনি সাব্‌ কাতে কিন মডায়েনা হাসা কীমি।

বরদমান খন বয়লা দয় হেচ্ আকানা। রেলগাড়িরের কামিয়া। রেলরে হড়কো বাহাল কোওয়া নওয়া সাঁদেশানতে চামপাই ঠেনে হেচ্ এনা।

মেতাদেয়ায়, “চৗমপাই দাদা রেলরে কামিম সেনঃ আ?”

চামপাই—“চেৎ কীমিয়া?”

বয়লা—“রেল খালাসি।”

চামপাই—“সৗরিনাঃ?”

বয়লা—“হেঁ-বাখান।”

চৗমপাইয়াঃ জিউয়ী মনে দ রৗস্কৗতে চুহুল বুহুলেনা। তেতাং তায়ম টটওয়াস মারাও লেনখান চেৎ লেকা জিউয়ী রাড়েচ্, রেয়াড় আটকারঃ আ, উনিই অনকায় আটকার কেদা। মিৎ ঘৗড়ি থির ঞঃ কাতে

চৗমপাই দয় মেনকেদা—“তাহলে য়া বয়লা চালাঃ গেয়া।”

বয়লা —“তবে নাহাঃ ই সঁগে তেগেঞ্ ইদি তরা মেয়া।” নিয়ৗ মেনকাতে বয়লা দয় ওডোং চালাওয়েনা।

বয়লা ওডোঙেন তায়ম হঁ চামপাই দ মাচিরে দুডুৰ্ আকানগে মেনায়া। আঁড়ি মারাং হুদিস গাড়রেয় বল আকান আর চেৎ চয় টীমডীও বাড়ায়েত্ কানা। গুনীনঃ কানায়—টাকা কামাওয়া, সাঁদৗরিওয়াঃ আসিঞ্ মেটাওয়া। হরঃ বাঁদেতে পেরেজেয়া, মঁজ সাড়ি কিরিঞায়া। গিদরৗকো আনতে জপরজলে পাতা ছাতা লিঞ্ দাঁড়ানা। অড়াঃ দুওয়ারলিঞ্ বেনাওয়া আর—আর.....সুলুক নিরাইতে জিয়নলিঞ খেমাওয়া। রাস্কৗতে চামপাই দ আঁড়ি রিতয়ৗন রাকাব আদেয়া। অড়াঃ ভিতরিতেয় ককে আদের কেদেয়া সাঁদারি আর আচ্ ঠেনে হৗডুব সোর কেদেয়া। চঃ আতেয় মেতাদেয়া — “মাই এঁগাত, বয়লায় ইদি লাগিৎ রেল কামি। আয়মা অকচ্ পয়সাঞ্ ঞামা। সানাম রেঁগেচ্ তেতাঙি চাবায় তাবোনা। অড়াঃ ইঞ্ হাতাওয়া আর মিৎ বার সেরমা মুদরেগেঞ্ ইদি বোনা। চেলে, রাজি মেনাঃ মেয়া সে বাং?” সাদারি দ খুলাসাতে দ বাঙে রাজিলেনা। আজরেন জুরি আচ্খন সাঁগিঞ্ রেয় তাঁহেন অনাদ বায় খজ কানা। মেনখান হেঁ মানাও কেদায়। ঘাঁরঞ্জ রেয়াঃ জালাতে ছাপাড়াও হোয়ঃ কানা। বয়লা সাঁওতে চামপাই দ বরদমান তেয় হেচ্ এনা। বারপে দিন মুদরেগে খালাসি কৗমি রেকো বাহাল কেদেয়া।

ইটীচ্ পটচ্ লল সেতং, জারগে জাপুৎ দেয়াকাতে খাট মরণে খাটাঃ কান চাঁমপাই, কড়ামরে মারাং আশ দহকাতে। রেল ইস্টিসিন্ রেগেয় গিতিচ্ আ। রুবুঃ রাবাং, সিঁকড়িচ্ বাঁইরিকো তুলুচ্ লাড়হৗই হোয়ঃ তায়া জাওগে।

রামো রামো টাকা পয়সা জগাও এ এহব কেদা, সানাম লেকানাঃ আঁউড়িয়াঃ খরচ বাঞ্চাওকাতে। নিয়ৗ অক্তেরে দ গিদার পিদৗর এরা ঊরু অহয় আঁগু কেকোওয়া। আশঃ কানায় আর মিৎ বার ধাপ চেতান সেচ্ রাকাব্ লাগিৎ। এডেখান পয়সা হুঁ ঢেরঞঃ এ ঞামা আর সানামকো আঁগুকাতে সুলুক নিরাইতে দিনে বিতৗওয়া।

চাঁদো পিছী অড়াঃতে টাকা পয়সায় কোলেৎ কানা। চাঁদো চাঁদো আর বাখান পে চাঁদোরে মিৎ ধর্ম অড়াঃতে সেন কাতেয় হিরি আঁগুয়েৎ কওয়া। অড়াঃতে সেনঃ পিছী গিদৗর পিদৗর লাগিৎ আঙ্গরপ্ পিন্টুল, বাহু লৗগিৎ মজ মজ সাঁড়ি,জৗকিট, স-সুনুম, সীবুন, পাওডার, আয়নম কাজারে ইদিয়া।

মানওয়া মনে জিউয়ী রেয়াঃ আনাট দ নিত নওয়া ধারতি সমাজ আরিরে বাং মেটাও লাগিদঃ আ। নিত নওয়াম এ্যামখান, ধিনীন হানা বানুঃ, নওয়াতেম পুরুনেন খান, হানারেয়াঃ রেঁগেচ্। জমতেম বিয়েন খান, মন রেনাঃ রেঁগেচ্। চেৎ এম মেনা, অকয়েম মেতায়া আর অকয়েম দসেয়া?

লবয় দ সাঁদারি রেন আতো সাগৗই এরেলতেৎ। চামপাই রেলগাড়িরে কামিয় সেনেন খান সাঁদারি দ লবয় সালাঃগে হাসা দিপিলে সেনঃ আ। দিনাম হিলঃ হেড়াগেসারে তাহেঁন তাহেঁনতে লবয় দ আঁমৗলিয় ঞাম কেদা। সেতাঃ আঁয়ুব্ সিএ সাঁটুব্ খিলডু খিলডুতে বানা হড়গে বাই বাঁইতে দুলৗড়রে তড়ে সুতৗম লেকা তলঃকিন এহৰ্ এনা। অনা সুতৗম তনল দ লুমৗং গুটলি লেবা গুড়হু গুলৗডেনরে হঁ অকয়াঃ মে হুঁ বাং আঁঠড়ে লেনা। অনা সুতৗম গানৗড়ি দ আঁড়ি সন্তরতে গুটলঃ কান তাহেঁ কানতে পাসেচ্ চং চেৎ চং। সাঁদারি আর লবয় দ নংকা দুলৗড় তনল তেকিন তপল আরকিন তল মেঁড়হাও এনা— তায়ম দারাম চেৎ হোয়ঃ আ অনা দিসৗ দিসানা দ দুলৗড় রেয়াঃ হেড়েম রাসাতে ঝাবরাও আকান তাহেঁতে ধারতি দ ধুঁতগেকিন ঞেলেত্ তাহেঁকানা। দুলৗড় তলতে তল খাতিরতে সাঁদৗরি দ গিদৗর পিদৗর জাঁওয়ায়তেৎ সানামে হিড়িঞ্ কেত্ কোওয়া।

সেতং দিন অক্তে কানা। সাঁদারিরেন তালায়িচ্ কড়া গিদরৗ সুরিন দ সেতং রুওয়ৗ ঞাম আকাদেয়া।

উনি গিদরৗ দ বে-জতন রেগেয় তাহেঁয়েনা। রান হুঁ বাং, মুরগিন হুঁ বাং। হাসা কাঁমি খন তালা আধঞিদী সাঁদারি দ অড়াঃ এ রুওয়াঁড়া। চাঁদো হাঁসুরঃ দেলাদিলি হাসা কৗমিকো ভাগঃ আ, ইনৗ তায়ম দ আয়ো বাবা মিত্তে সুঁড়ি গদাম তেকো সেনঃ আ। হেডগে হেসাঃ আয়ো বাবা পান্তে কাতে হাঁড়ি কো ঞুয়া আর সেরেঞ সেরেঞতে অড়াঃকো রুওয়ৗড়া। অকা অকা দ সাদারি তালা আধা ঞিদৗ হেচ্ কাতে বায় ঢাকায়া গিদরৗকো দ জালাৎ জাপাৎ কুকুচ্‌ কাতেকো গিতিচ্ কঃ আ দাকাকো কয় লেখান মুকৗড়তেয় বুঝৗও ওচো কোওয়া। নংকাতে সুরিন দয় ঞেল ঢিলৗউ কেদেয়া। সেতং রুওয়ৗ আরহ বাড়তিয়েন তায়া। জীবুন উতৗরেনায়। তিনরে এন্তেৎ এ জতনেয়া সেতাঃরেয় অডোঙঃ আ হাসা কামি আর তালা আধ ঞিদৗ অড়াঃ এ বলঃ আ দুলৗড়তে গুটলি আকান লুমৗং দ পুটীগঃতে ফারকাও লাগিদঃ কানা। অনাদ তাক বাতার, অক্তে নৗপিত রেয়াঃ চেৎ ধারণে বায় ধারাওয়া। দুলৗড় রেয়াঃ মঁহেতেগে ফারকাও রেয়াঃ ফাঁকড়া দ জানামাৎ কিনৗ। —“দেলা দেলা আদ বাং লাং তাহেঁনা, বাড়ায় গৎ লেলাং খানকো বহঃকো এর তালাঙা।” লবয়াঃ সিচ্ কাঁটুব্ সাব্ কাতে সাঁদারি দয় মেন কেদা।

—“গিদরী কাঁহিলে রুওয়াঃ কান তামা আর আম দ চেৎ কাথাম মেনেৎ কানা।” লবয় দয় রড় রুওয়াড় কেদা। 

সাদারি --আর কাঁহিলে রওয়ৗয়েন, ইঞাঃ দ চেৎ চেকাঃ তিঞৗ? আপাততেৎ দ খাটওয়ৗয় সেন আকানা গিদৗর গিদৗর বাগি কাতে, ইঞ্দ অহ জতন লেকো তায়া।” আওগার সাহিচ্ সাঁদারি দয় রড় কেদা।

—“দেলা দেলা দেলা উসীরা।”

—“সৗরিগে সারিগে!!!”

সাঁদৗরি দ় কিচরিচ্ খাওয়াঃ এ ঘেঁট কেৎ তায়া। লবয় হয় সাপড়াও হেচ্ এনা। রুওয়াতে জীবুন আর জাপিৎ গিদরী বাগি অ ট কাতে তালা ঞিদৗ অড়াঃ খনকিন ওডোঙেনা। দিসৗম খনকিন অডোঙেনা, তিরেজুগে, তিরেজুগে, তিরেজুগে, খিড় খিড় খিড়!!!

সিমরাঃ ঞিদৗ অক্তে। রুওয়ৗতে কাহিল আকান সুরিন দ দাঃ তেতাংতেয় ছাটপাটাঃ কানা! “দেন গ দাঃ, দাঃ গ দেন, দাঃ গ দেন, আয়ো গ গচ্ ইনৗঞ, উ–উ–উ। ঞুড়ৗঃ ঞুড়ৗঃতেয় রাঃ এৎ কানা সুরিন। নাডরি দ খিয় খয়য়েন তায়া, মচা হুঁ রহড় আকান তায়া, একালতেয় লরাও চাবা আকানা। আটেৎ খনগে বায় বেরেৎ দাড়েয়াঃ কানা।

সুরিনাঃ রাঃ আঁজম কাতে আতো হড় দকো দাঁড় আঁগুকেদা, ঊন দ সুরিন দ দাঃ কাঁড়া সোররে ভিদাড় কাতেয় গচ্ আকানা। আতো হড় দ সাঁদৗরি গটাকো সেদরা বাড়া কেদেয়া। বাংকো ঞাম লেদেয়া। বাকসা দ অন্দড়ং আউলীউগে মিৎ সা রেকো ঞেল ঞাম কেদা আরকো বাড়ায় কেদা বাংমা খাটিগে সাঁদারি দয় আঁঙ্গির আকানা। হায় হায়, চঃ চঃ বাড়া কেদাকো উনি গচ্ গিদরৗ ঞেলকাতে। সারেচ্ আকান আর গিদরৗকো দ কাউ কাউ কো রাঃ কেদা। অনা আঁজমতে আতো হড় কো দ আঁডি দুক কো বুঝাও কেদা আর সাঁদৗরি তুমতে সিঁড় ভাড নিসড়ৗও কাতেকো এগের কেদা। চামপাই ঠেন হড় সেনকাতে সানামকো লাই আদেয়া। চেটের এরাদে লেকায় আইকাও কেদা। বহঃ চাপোকাতে কাটিচ্ গিদরৗ লেকা রাঃ রাঃতে অড়াঃ এ হেচ্ এনা।

অড়াঃ রেয়াঃ হালত ঞেলকাতে আঁড়ি আঁটে কাঁহিসেনা—কাহিসতে হড়ম জিউয়ী মনে দ হিদিচ্ হিদরৗওতেয় সময়ৎ চাবায়েনা। আলাৎ বাকাৎ এনায়।থড়াদিন তায়ম খানগে লবয় আর সাঁদারি তাঁকিনাঃ দুলৗড়তে তললেন তনল নাড়ি তপাঃ এনা। লবয় দ সাঁদারি ঞির বাগি কাতে অন্তেরেয় বাহুওয়ানা। তালা বাইহীড়রে সাঁদারি দ কাঁহিসতে জহা চাপো কাতে সুরুচ্ সুরুচ্ এ রাঃ এৎ কানা। অকয়ে দুগেয়া নিতঃ দ অকয়ে হীর সাঁওহায়েয়া? মিৎ সেচ্‌তে চামপাই দয় কাঁহিসঃ কানা আরমিৎ সেচ্‌তে সাঁদৗরি, কাঁহিস কাঁহিস তিঞ্ তাপাকিঞ্ঃ কান তাকিনা। তারকো এ্যাপামঃ কানা খাড়াং খচাং দাড়াং রেয়াঃ কচা কঁড় করে আর হুঁ ভারডো সাঁও মিলাউ কাতে গুরলৗওঃ কানা।

আপান আঁপিন ঠাঁইরে তাহেঁ কাতে কিন হায়মঃ চাবায়েনা। বানা হড়াঃ মনে জিউয়ীগে তিঞ্ তারকোঃ কানা, তুঞ্ খেঞ্চের চালাঃ কানা। আর আপান আঁপিন কাঁহিস রেয়াঃ দারাং দারাং লল তেকিন লঃ কানা ছেঁক ছেঁক।

মুচৗৎ

দুখ আর সুখ ☞ডমন সাহু সমীর

 দুক আর সুক 

ডোমন সাহু ‘সমীর’

“নুনৗঃ ইঞ খাটাঃ কান রেহঁ সুক দ বানুঃ তিঞৗ। এরা হপন জত কো আটাপ-জাড়াপ্ চাবায়েন তিঞৗ। মিৎ বিতৗ লাচ্ লাগিৎ সোতোঃ সুমুং জিউয়ি লাগিৎ সিঞ মা ঞিদৗ খাঁয়-খাঁয়, হায় হায় তে দিন দ চালাঃ কান তিঞ। তিনৗ বিঞ দান্দঃ আর সে, রিন গে তিনৗঃ বাঞ জম, হায় চাঁদো ইঞ লেকা দুক দ অকয় হঁ বানুঃ তাকোআ।” – মিৎ হড় র-রডিঞ আঁজম কেদেয়া।

“নুনৗঃ ইঞ আরজাও ডৗঙ আকাৎ রে হুঁ সুক দ ওকোরতিঞ? সিঞ পাটুব কোমবড়ো-ডৗকুঃ রেয়াঃ বতর মা মেনাঃ গে, রুওয়া-হাসো খন ই সাহাড় দ বানুঞা। রেঁগেচ্ হড় গে সুকরে দ হেনাঃ কওয়া। কৗমিয়া কো, জমা কো, এয়াকো, রৗসকৗ তে ক তাহেঁনা আর নিচিনদি ক জাপিৎ জংআ। চিনতী-ফিকির দ বানুঃ তাকোওয়া।” – দসার হড়ে র রড় কান তাহেঁকানা।

“আচেল পাচেল অড়াঃ-দুওয়ৗর, আসেচ্-তাসেচ্ অন ধন, আটাল গঁড়াল হরঃ-বাঁদে; অকয়ক সুক-ভগ তিঞৗ? সাকাম বেগর সারজম দারে দ বাং ঞেলঃআ; হপন বেগর দ অড়াঃ-দুওয়ৗর দ বাং সাজাঃ আ। চেইঞ চেকায়া? গেলে বালে মা বানুঃ কুতিঞ। হায় চাঁদো ইলেকা দুক দ অকয় হঁ বানুঃ তাকোত্ম।” – তেসার হড়াঃ কাথাঞ আঁজম কেদা।

তিনৗঃ বাম আঁজম? আজম-আঁজম তেম তিগিৎ কঃ আ। বাড়ায়ঃ আ, নওয়া ধারতিপুরি রে দ একেন দুক গে ছৗপলৗউ বাড়ায় কানা চেলেচ্;সুক রেয়াঃ দ নাম নিসানগে বানুঃ আনাং অকারে হুঁ। নুই নওয়া দুক মেনাঃ তায়খান উনি দ অনা আর হানি দ হানা। রেঁগেচ্ হড় দ ক হুদিসা – কিসৗড় হড় দ আঁড়ি সুকরে হেনাঃ কওয়া; মেনখান নওয়া দ বাং সারিয়া। অনকাগে কিসীড় হড় দ ক হুদিসা – রেঁগেচ্ হড়গে সুকরে দ হেনাঃ কওয়া চেদাঃ জে লাচ্ ছাড়া এটাঃ ফিকির দ বানুঃ তাকোআ ওনকো দ। মেনখান নওয়া হঁ বাং সৗরিয়া। সুক আর দুক রেয়াঃ মায়া জাল দ এনতেৎ গোটা টাঁড়িগে তিচ্ আকান মেনাঃআ। ধারতিরেন সানাম জিউয়ি আন অনা জাল রে দ কো ঝৗলি ঠব আকানা। নওয়া কাথা দ নংকা হুঁম মেন দাড়েয়াঃ আ জে নওয়া বুড়ি ধারতি দ সুক আর দুক রেয়াঃ কুহড়াতে এসেং আঁবুর আকানা। সিঞ আরঞিদৗ, এত আর মারসাল, বুগি আর বাড়িচ্, চাঁদো রাকাবঃ আর হাসুরঃ লেকাগে সুক আর দুক হুঁ মানওয়া জিয়নরে সাল-মেসাল মেনাঃআ। মিৎ সেচ্ সুক মেনাঃ খান এটাঃ সেচ্ দ দুক হুঁ মেনাঃআ; ওনকো মেন সিক – ‘সুক আর দুক দ সাঁগাত ভাই কানাকিন।' নওয়া হঁ সারি কান গেয়া জে সুক বেগর দুক আর দুক বেগর সুক দ আটকার তেহঁ অহ আটকার লেনা। নিম জম আকাৎ হড় দ আঁক জজম আড়ি আঁট সানায়েয়া আর বায় ঞাম লেখান দয় লালাওঃ আ; মেনখান আঁক জম মকঞ আকান হড় দ আঁক এ্যামলেরে হঁ জজম বাং সানায়েয়া, রচং উনি দ রাহাম জিনিস জজমে মেন জংআ। অনকাগে দুক সাহাও আকাৎ হড় সুকে ঞাম লেখাচ্ লাহা লাহা দ আঁড়ি এ রৗসকৗঃ আ, মেনখান থড়া দিনতেগে অনা সুকতে দয় আঁড়িস চাবাঃ আ

আর এটাঃ এ উইহৗরাঃ আ।

আসল দ নওয়া কানা। আডি উতৗর হড় অড়াঃ দুওয়ৗর, জম-এ হরঃ বাঁদে, এমান তেয়াঃ তে পেরেচ্ পুরুন কোঃ গে সুক দ কো মেতাঃ আ, মেনখান অনা দ আসল সুক দ বাং কানা। অনা সুকদ হাঁড়ি-পাউরৗ রেয়াঃ নিসৗ লেকানাঃ — তিনৗঃ এম এয়া উনৗঃ গেঞঞ সানামেয়া, তিনৗঃ এম ঞামা উনৗঃ গে ঞাঞাম সানামেয়া মনে দ বাং তিরপিতঃ তামা। মেনখান আসল সুক দ বাং অনকাওয়া, আসল সুক তে মনে দ তিরপিততে হুঁতিরপিতঃ গেয়াঃ আর, অনা গে কো মেনা সঁতোষ পরম সুখম মেতাঃ মে 'তিরপিতঃ গে আসল সুক দ।' নওয়া গে এটাঃ লেকাতে দ নংকাবো মেন দাড়েয়াঃ – ‘অকারে তিরপিতঃ বানুঃ আ অঁড়ে দ সুক বানুঃ আ

সুক রেয়াঃ আসল জনড়াও দ মনে জিউয়ি তুলুচ্ মেনাঃ আ। আম অকা লেকাম মনে আকাওনা অনা লেকা গে হোয় এনা মেনখান, আডি সুকেম আঁইকাউওয়া। আর নওয়া রেয়াঃ উলটাতেৎ গে দুক দ; অকা লেকাম মনে আকাওনা অনা লেকা বাং হোয় লেনখান দ দুকেম আইকাউওয়া। সুক সে দুক দ অড়াঃ দুওয়ৗর, জম-, হরঃ বাঁদেন এমান রে দ বাং জেমঠে আকানা, বরচং অনাকো খন দ জুদৗ গেয়া। অনা তেগেম ঞেলা, আঁড়ি উতৗর হড় রেঁগেচ্ রে হুঁকো সুখি গেয়া। মেনখান আদম হড় দ কিসৗড় রে হুঁ দুক দাদ খন সাহাড় দ বানুঃ কোওয়া।

জুমি অড়াঃ-দুওয়ার, জম-এ, হরঃ-বাঁদেন এমানরে মেনাঃ সুক-দুকগে আসল সুক-দুকেম মেতাঃ খান, এঁডেখান অনা সুক জ্ঞাম সে অনা দুক লাগায় রেয়াঃ রান দ আম ঠেন গে মেনাঃ আ। নওয়া কাথা দ চেদাঃ বাম দিসৗয়েৎ কানা? আমেম কুরুমুটু লে আনেচ্ বাং চাঁদো বাবা হয় অহয় গড় লেমা। দিসৗ দহ কাঃ আম তিনৗঃ এম আরজাও এদা অনা খন বাঁড়তি দ আলম খরচা, তিনৗঃ খীল-পিছাওড়ি মেনাঃ তামা উনৗঃ গে জাঁগা দ তিয়ৗরতাম আর বাংখান দুক রে দ খাটিম ক্রুরঃ আ। আম জৗরুড়াম কান জিনিস ক লাগিৎ দ দাড়েয়াঃ ভোর আপনার ভরসাগে তাহেঁনমে; এনতে ‘হড় ভরসা তুবৗ রাসা’ কহতুক দ জানিচ্ এম আজম আকাৎ গেয়া। অনাদ সোলো আনা সায় পায়সা যথাত গেয়া। অকা জিনিস রেয়াঃ জারুড় বানুঃ তামা সে অকাটাঃ বেগর কামি বাং আটকাঃ তামা অনাদ আলম লালচাঃ আ, চেদাঃ জে অনা কান গেয়া দুক রেয়াঃ মিৎ আসল অজে দ। অকারে জারুড় বানুঃ আ অঁড়ে দ রেঁগেচ্ হুঁ বাং তাহেঁনা। আর হুঁ দুনিয়া রে দ ‘সোদারাম’ হুঁ আঁড়ি উতৗর হেনাঃ বাড়া কওয়া। অনকান ক খন দ মিৎ তালাও সাহাড় তাঁহেন জারুড়া, আর বাং খান ‘তাহেঁন রে দ হাটাঃ হাটাঃ, বাং খান দ বাটাঃ বাটাঃ’ রেয়াঃ হাল হোয় বতেচ্ কঃ আ।

মুচৗৎ রে দ নওয়াগিঞ মেনা জে, নওয়া ধারতিপুরিরে দুক রে দুক মা মেনাঃ গে সুকরে হঁ আঁড়ি মারাং দুক মেনাঃ আ। অনা রেয়াঃ গে হিন্দি রেন আঁডি নামডাক কবি সে অনড়হিয়ী শ্রী সুমিত্রা নন্দ পঁত দয় মেন আকাৎ আ –

“ জগ পিড়িত হে অতি দুঃখ সে,

জগ পিড়িত হে অতি সুখ সে।” আচ্ কাথা, ‘দুনিয়া রেন হড় দ জৗসতি সুকতে আঁড়ি বাড়িচ্ ব সাসেতঃ কানা; দুনিয়া রেন হড় দ জাসতি সুকতেহঁ আঁড়ি বাড়িচ্ ব হারখেতঃ কানা।' নওয়া লাইতে কবি দয় মেনেৎ কানা জে

“ মানব জগ মেঁ বঁট জাওয়ে,

দুখ সুখ সে ও সুখ দুখ সে।”

মেতাঃ মে, মানওয়া হপনাঃ নওয়া দুনিয়া রে দুক আর সুক সে সুক আর দুক দ অতং তায়নম হাপাটিঞঃ মা। সৗরি, সুক আর দুক দ রেয়াঃ হেড়েম-হাড়হাৎ, সেবেল-সাবাঃ তেং গে মানওয়া-জিয়ন রেয়াঃ আসলাঃ তেৎ দ। নওয়া ইয়ৗতে সুক রেয়াঃ সেবেল-সড়ম চাখা আটকার সে দুক রেয়াঃ তহৎ তাকিচ্ কাজাক জুত তেঁগো দারাম তুলুচ্ জিয়ন ডাহার রে লাহা ইদিঃ গে নওয়া জিয়ন রেয়াঃ জসতেৎ দ তাহেঁন তাবোন মা, এঁডে আনিচ্‘জহাঁ চাহ তহাঁ রাহ’ মেতাঃ মে— জাহাঁ বো মনেয়াঃ আ অনা দ ব লেটেজ গেয়া।'

মুচৗৎ

ঞিদৗ ঞুতৗ

 ঞিদৗ ঞুতৗ

সারদা প্রসাদ কিস্কু

নাইহৗর রেকো এম আকাওয়াদে সাসাং ধুতিতে লাটুম কাতেয় উয়ুওয়াকানা, আরসি খোপ গামছা তেয় দাহড়ি আকান, ধুড়ি জাঁগা ইঞ দাদা সেতাঃ সেতাঃ অড়াঃরে হেরাকিন আর লাঃ হাপা দহ তরাগে অডক কাতে মেলারে তাঁহেকান পারকমরে বহঃ রেয়াঃ দাহড়ি রাড়া দহয় তুলুচ্ এ মেনকেদা- ‘আর বাড়ে তালা মাই জাঁওয়ায় ঞিদৗ নংকাঞ পাঁজা আকাদে! তেহেঞ রেগে লুতুরিঞ পেটের কেদা।

ইনৗ আজম ছট আলে দ মারাং হিলি, ইঞ আয়ো, ইঞ মারাং দাঁই আর হপন বাবু এমান রাচারে অড়াঃরে জাঁহায় জাঁহা রেলে তাঁহেকান তি রেয়াঃ কামি বাগিকাতে ঝুমলীই মেনতেলে হেচ্ জাওরা গৎ এনা আর বগে বাড়িচ্ খবর বাড়ায় জং লাগিৎ দাদালে থোপরো এসেৎ কেদেয়া।

জাঁহায়গে যাহাঁ লেকালে দাড়েয়াঃ কান আপান দাড়েলে কুলিয়েকান চেৎ চেকায়েনা? তিন রেবেন সেটের কেদা? চেদাঃ নতেগে বাং বেন রুওয়ৗড় হেচ্ লেনা? এমান তেয়াঃ।

কুকলি রেয়াঃ গাজাড় তালা খন ইঞ দাদা আঃ কাহিস আর কেটেচ্ আড়াং আজম ঞামেনা – এগাঁতে তিস হঁ ডৗন বাঞ ঞেললেৎ কওয়া তালা মাই জাঁওয়ায় হতেচ্‌তে ঞেঞেল হোয়েন তিঞৗ। হড় হপন হতেতে আর কাটিচ্ খানগে জিউয়ী চালাও কঃ তিজ্ঞৗ।

আলে দ বতরতে ভাবনাতে চাহাপ্‌ কাতেলে তাঁহেয়েনা । জহারেয় চাপ গৎ এন ইঞ আয়োতেৎ রাঃ মেঁ আহা কাতেয় কুলি কেদেয়া – “ও হায়! অকারে বেটা?” ইঞ দাদা দ পারকমরে দুড়ুব কাতে মিৎ ঘাড়িয় থির ঞঃ এনা আর কাথা লালায়ে এহপ্ এনা।

আডি উসৗরৗঞ তাড়াম কেতে উনি ভুচুং দ বাঁধ পিঁড়ে ঠেনগেজ্ঞ আপটাও তিয়োঃ কেদেয়া কাঁড়েৎ মাঁড়েৎ এম চালাঃ কান। রুওয়ৗড়ঃ লাগিৎ ইঞ মেতায় কানা খালি বহঃ গেয় হুতমৗয়েত্ তায়া, আরে রাঃ এদা। অনাতেঞ গটা কেদা ইদি সেটের কায়তে অড়াঃ রেগে হাজাও অট কায়া। হেরাকিন নতে দ ভাগেগে জোল সেন এনা। রাকডি হর ধারে ডুংরি হুঁ লিঞ দেয়া আকা হেরাকিন হঁ আচকাগে ইড়িচ্ এনা। চাঁদো মা অড়াঃ রে তাঁহেন তেগেয় হাঁসুর আকান তাঁহে। চেকায়াম, ইনকৗ এত গেলিঞ লাহা সেনঃ কানা। উনি দয় লাহা আকানা ইঞ দ তায়ম তেঞ অতং আকাদেয়া। ইঞ দ মনেতে দঞ মেনেৎ গেয়া নংকা রেগে উৗনকো এসেৎ আ। আর সীরিগে কারাম ঘুটু হানাসা গড়া লিঞ রাকাপ্ আকানা টেড়েচ্ ঘুটু মেসা আকান দ বীটিয়া হেসাঃ দারে দ আউরি লিঞ তিয়াগা, ইনৗ খানগে জাঁওয়ায় দ চালাঃ চালাঃ আচ্‌কা গেয় চিকিচ্ রুওয়ৗড়েনা। ইঞ দঞ বাদস গৎ এনা। কড়াম ঢায় ঢায়ঃ তুলুচ্ ইঞ কুলি কেদেয়া চেদাঃ আচ্‌কা গেয় তেঁগয়েনা মেনতে। ঊন দ বুল দয় চেঠা আকানা। বৗরু ঘুটু মাঝি কুলহি সেচ্ খনাঃ ডাহার ডাহারতে হিজুঃ কান মিটেন মারশাল উর্দুঃ কাতে হিদিচ্ আকান আড়াংতে বাঁই বাইতেয় মিতাঞ কানা মাসে ঞেল বেন, অনাদ চেৎ মারশাল কানা?

বানা হড় তেলিঞ বেঁগেৎ ঞঃ আদা- সারিগে মারশাল দ ঘানে ত্রুডু ডুঃ কানা, ঘানে দ ইড়িচ্ উত্তৗরঃ কানা আর আদম জখান দ দুগুর মেনতে জোল কাতে ডাহার ডাহারতে হিজুঃ কানা। অনা ঞেল কাতে ইঞাঃ দ নৗডরি জাকে রহড় এনা। খায় খয় কাতে মেতায় কানা, অনা দ নওয়াকো মারশাল

লেকা দ বাং লেঃ কানা, ঠিক ডৗন সেঁগেল কান চ চেৎচ!

মেনখান চেৎ এমচেকায়া? মে দেলাং তায়ম সেলাং রুওয়াঁড়া গালমারাও গটা গৎ কেদালিঞ। তায়ম সেচ্‌লি কয়গ্ দ আয়ো গো! অনতে খনাঃ মা বারয়া মারশাল আঁলিঞ সেচ্‌গে দারদার হিজুঃকান! হড় দ বতর তেলিঞ তুলারাম আকানা! হিনী নিয়ৗ হুদিস রেয়াঃ হুঁ অকতে বীনুঃ আ।

এতম পাহটা মা বির মেনাঃ। অনা সেচ্ গেলিঞ দাড় ইদি কেদা। জিউয়ী জালা মুরুৎ গাজাড় মেনাঃ অঁড়ে মিঠেন ধিরি কো গাদা আকাৎ, অনা চেতানরে দুডুপ্ কাতে কয়ঃ এদালিঞ তাক তরম ঞেল লাগিং।

ঞেল কেদালিঞ বৗরুঘুটু সেচ্ খনাঃ জাঁহা মারশাল হিজুঃ কান তাঁহে, অনা দ পেয়া গৎ আকানা আর মিৎ ঘাঁড়িতে বানার সেচ্ আঃ মারশালগে দ বাটিয়ৗ হেসাঃ দারে ঠেন হেচ্ জারওয়ায়েনতে বেড়হায়তে মিৎধাও আঁচুরেনা।

নিত দিসৗ বাড়ায় হঁ বতর গেঞ আটকারেদা। উন দ মানতার তে হড়মো লিঞ তল আকাৎ তাঁহেকানতে।

এনহ বতর গে আইকাঃ কান তাঁহে। দারে বেড়হায়তে কো আঁচুরেন খানগে পেয়া মারশাল দ ইড়িচ্ এনা আর বারয়াগে জোলোঃ কানা। আদম জখান দ ডিগ ডিগ মারসাল গদঃ কান তাঁহে। উন দগটা গটা কো ঞেল ঞামঃ কানা।

ঞেল ঞাম এনাকো মড়ে গটেচ্ ডৗন এরা। গেঁদড়াঃ দ অকয়াঃ হুঁ বানুঃ তাকোওয়া, ঠুটকি জনঃ তেকো বাঁদে আকানা। বানার মারশাল মিটেন ডান এরাগেয় সেপেঞ্ঞ আকাদা। বারয়া খান বগেতে কিন রুমঃ কানা, বহঃ উপ্ দ রাড়া আকানতে দালায় দালায়ঃ কান তাকিনা। রুম রুম কাতে দারে সোর ঠেন মিটেন বুনুম মেনাঃ অঁডেকিন অঁবাগঃ, ইকডুমঃ কানা! তিনরে লিঞ ঞেল কেদেয়া উনকু তালারে মিটেন কুল মেনায়, গটা হটঃ গটা দাবনা লাটু লাটু জাটা তায়, নাপায়ে বুরুম আকানা আর বারয়া ডান এরা তেকিন নাকিচ্ কায় কান আরসি উর্দুঃ আয়তে উন দ আড়ি বতর লিঞ আটকার কেদা। বতরতে আদ বাংলিঞ তাঁহে দাড়েয়াদা। উনকু মা অনতে রেকো অনকা বাড়ায় কান, আলিদ অঁড়ে খন তিরে সাপাপ্‌ কাতে এসালিঞ দীড়াৎ তাঁহেকানা গড়া গড়াতে, মিৎ দাড়তে একাল বিরু ঘুটু কুলহি মুচৗৎ।

কুলহি মুচৗৎ খন লিঞ কয়ঃ লেদা, মড়ে গটেচ্ দ চেৎ অনা খন হুঁ সাঁগে মারশাল আঁলিঞ লিঞ অক লেন মুরুৎ গাজাড় ঠেন জালাৎ জোলোৎ বাড়ায় কানা আচ্ কাথায় চেলেকো পাঁজা বাড়ায়ে কান লেকা।

আলিঞ দ আয়াং বিঞ লেকা ফুঁ মেনতে লিঞ সাঁহেৎ কেদা। অকাঃ আলিঞ? বীরুঘুটু হপন কৗকি তেকো ঠেনলিঞ বলয়েনা। ঊনকু সানাম কাথালিঞলাঁইয়াৎ কওয়া হহ বেরেৎ কাতে। আদ কো মেতালিঞ কানা চাঃ নুনৗঃঞিদৗ  বেন হিজুঃ কানা? এনতে নডে দ তেহেঞ গে টাটকা হড়ে গচ্ আকান! আর জাহাঁঠেন কো তপা আকাদেয়া, অনা মুরুৎ গাজাড় রেগেবেন উকুন কানা! বাং হালে কো জম বেনা।

ইঞ দাদা আঃ লৗই আঁজম কাতে আলে দ যত কোতেলে মেনগৎ কেদা হিটু আয় কানা উনি বাউলী উনৗঃ কাতেয় পাঁজায়ে কানা! খানা কোরে ভিদৗড় কাতেয় রীপুৎ গচ্ তাচ।

ভটে কুমৗং দ অড়াঃ রে হাঁড়িয় ঞু ঞু কান তাঁহেকানা, এনতে উনি দ ওঝা হড় ইনৗ তলহাট দ গটাকো আসেনেয়া। উনি দ হাঁড়ি ঞয় তুলুচ্‌গে যত কাথায় আতেন আকাদা। আঁজম পুরৗও কেৎ অডক এনায় অড়াঃ খন আর ইঞ দাদায় মেতায় কানা আপে দ হো, ইরিচ্ চিকিচ্‌গে বাং চাবালেন তাপেয়া। দিন নাই খেন, অকারে চেৎ পে লে আকাওনা! বাড়ায় গেয়াপে, কারাম ঘুটু বীরঘুটু হড় দ ছুং ছুং কো ডৗন গেয়া।

অনাকিন আতো এম লেখান হড়কো বতরঃ আ! অঁড়ে এগাঁতে ঞিদৗ কিন সেন আকানা!

ইঞ ঞেলিঞ পে, বীরুঘুটুরে ওঝাঃ গিঞ বাগি কেদা। মেতাম কান দঞ সাকেত্‌ পিঠা হুঁ বায় জম অচ আমা।

মিৎধাো সাকেত লে জমেৎ কওয়া। নডে খনাঃ দঞ ইদি তরা লেদেয়া পারানিক হাড়াম, আব বৗরুঘুটু রেনগে বার হড়কিন তাঁহেকানা। পিঠৗ হলে ইসিন ঠিক আকাৎ, আয়োগো! পেয়া কুড়ি হপন দ হানতে নাতে খন মিৎ তেক হেচ্ জারওয়া এনা আরকো মেতালে কানা চেলে, পিঠৗদ পে ইসিন কেদা সে বাং ? দেন হাঁটিঞ তাবন পে। আলে দলে বেঁপেগেৎ জং কানা। পেহড় দ হাপাচ্ হুপুচ্‌লে সাহায়েনা। পারানিক হাড়াম দ পিঠায় কেচাঃ বাড়ায়েত্ তাঁহেকানা। অনাতে আলে খনাঃ দয় তায়ম বাহাঁড় গৎ এনা। তিনৗঃ গান পিঠৗ চ গছা কাতেয় দাঁড় কান তাঁহেকানা, মিটেন এরা দয় বুঝৗও গৎ এনতে দাবিরেয় গের বিৎ এনা।

পারনিক হাড়াম দ মার রাচাঃ গিডি কাতেয় দাঁড় পিঠৗ হঁয় গিডি অট কাদা।

ঊনরে বাঁড়য়ীঞ বাচাও আকাদেয়া। নেতার হঁচ দাবিরে গের চিনহৗ মেনাঃ গেতায়। আর মিধাও হুঁ দাঁড়য়া রেন বাহহার তেৎ তেকো হেঁসেল বীদ সিম তোপোৎ খন রুওয়ৗড় জখান অনা বীরুঘুটু রেগে ডৗন ক খুদৗও লেৎ কওয়া।

অনাতেঞ মেতাপে কানা মিত কাতে নংকা ঞিদৗ ঞুতৗ আলপে দাঁড়ানা। আর চেদাঃ পে উসৗৎ অচ কেদেয়া, অকয় চেৎ মেতাদেতে? বাড়ায় গেয়াপে লাঁদা কাথা হুঁ বায় সাহাওয়া। আদ ইঞ আয়োদ মেমেনে এহপ্ এনা- মেন দ চেৎ হুঁ বাংলে মেন আকাওদেয়া, খুনটাউ ডাংরা কো ঞেল বাড়া কাতে গটা কুলহি কো দাঁড়া আকাৎ আ। কেদগঃ হুঁ মিৎ তেগে কো হেচ্ আকানা। ঢাকা উত্তু লো বাড়ায় তেগে তালা জাঁওয়ায় দুওয়ৗর দয় দুড়ুপ্ এসেৎ কেদা।

হপন বিটি দ'ইনৗগেয় মেতায় কানা-এ তালা তেঞাং মেনসে কাটিচ্ সাহা কাতে দুড়ুমে। ঞেলেৎকো গেয়ামসে হুডিঞ হাপড়াঃ হড়কো অডং বলন কানা। দুওয়ৗর তেৎ নাসেনাঃ আড়াগমে।

মেন দ ইনৗগে। অকারেম ঞাম, তালা জাঁওয়ায় দ আঁড়ি আঁটতে ভিড়খাউ কাতেয় বেরেৎ এনা। হেঁ মা ইঞ পে হিরখা আঁঞ কানা, ইঞ দ নওয়া অড়াঃ রেন দ চেলে গেঞ বাং কানা, ইঞগে গটা অড়াঃ ইঞ এসেৎ লেদা, আদ বাঁঞ তাঁহেনা। মেন মেনতে হাপায় হাতড়াউ অডক কেত্ তায়া আর অড়াঃ খনে দন তোত্ এনা। আদ খালি হঁ দাঁড় রেয়াঃ গে। তিনৗঃ হড় তেলে মানায়ে কানা বাং, অকয়াঃ কাথাগে বায় বাতাও লেদা।

ইঞগে মারাং বেটা দঞ মেতাদেয়া দো বেটা, বাঁধ পিঁড়হৗ তেৎ মারসাল ইদিতে ঞেল পারম গৎ কায় মে। বুল আকানায় যাঁহা খারাং করেয় ভিদৗড় তানাঃ কঃ আ। চাঃ বাবা, হড় হপন গালিঘর তাঁহেনা। বেজার গেম আঁইকাউ কেয়া। হড় হপন হতেতে সুকতে বাংলে সহরায় লেনা। আদ তেহেঞ খনাঃ

ঞিদৗ ঞুতৗ নংকা দ আলগেপে সেনঃ আ ৷

মুচৗৎ

সান্তালি সাওহেৎ ☞সেরেঞ

সানতাড়ী রড় সাঁওহেৎ : সেরেঞ

মহাদেব হাঁসদা

ধারতি রেয়াঃ জত সাঁওহেৎ গে লাহা দ থুতি লেকাতে তাঁহেকানা। বেদ, উপনিষদ, রামায়ণ এমান হ লাহা দ মচা মচা তেগে চারচা হেচ্ আকানা। আঁজম কাতে সেঁড়ায় হোয়োঃ হতেতে বেদ রেয়াঃ আর মিৎ তুম দ কানা – ‘শ্ৰুতি’। সানতাড়ি তেই গাম, কৗহনী, বিনতি,বাঁখেড়, সেরেঞ, কুদুম এমান যতগে মচা মচাতে সে থুতি লেকাতে হেচ্ আগু আকানা। তেহেঞাঃ দিনরে নওয়া কদ থুতি সাঁওহেৎ সে রড় সাঁওহেৎ বন মেতাঃ কানা। আদম কদ হড়-সাঁওহেৎ সে লোক সাহিত্য হঁক মেতাঃ গেয়া।

সানতাড়ি পারসি রেয়াঃ রড়-সাঁওহেৎ দ আঁডিগে মারেয়াঃ আর কিসৗাঁড়া। নওয়া রেয়াঃ মিৎ মিৎটাং পাহটা ইদি কাতে আয়মা তুলৗ যখা, গালমালাও আর খদ বুঁদ তেয়াঃ মেনাঃ আকাদা। নডে আব দ একেন সেরেঞ পাহটা তেৎ বন গালমারাও লেগে। 

সানতাড়ি সেরেঞ সানতাড় হপনাঃ জত খন মারাং ওনোরোম দ মেনাঃ আ- সেরেঞরে। সেরেঞ দ রৗস্কৗ রেয়াঃ ঝারণা কানা। মেনখান সানতাড় দ একেন রৗস্কৗ জং গেক সেরেঞা অনকা দ বাং। রেঁগেচ্ রে তেতাংরে, দুকরে হারকেতরে, কামিরে কৗসনিরে, বঁগায়রে বুরুয়রে জত জখান গে সেরেঞ ক আঁড়তিয়া। মিৎ কাথাতে জানাম খন গুজুঃ হৗবিচ্‌ জত জখান গে সানতাড় হপনাঃ দ সেরেঞ আর সেরেঞ। আচ্ কাথায় সেরেঞ বাদ কাতে জিয়ন দ মিছৗ গেয়া।

নানা হুনৗর রাহা রেয়াঃ সেরেঞ :

রৗড় সে রাহা লেকাতে হাঁটিঞ লেখান হড় সেরেঞ দ আয়মা থকরে হাঁটিঞঃ আ। জেলেকা - ১) দং ২) লাঁগড়ে ৩) দাঁশায় ৪) সহরায় ৫) বাহা ৬) কারাম ৭) সেঁদরা ৮) পাতা ৯) ডাহার ১০) গলওয়ার ১১) মাওয়ার ১২) ডানটা ১৩)রিজৗ ১৪) কৗহনি ১৫) হেড়হেৎ এমান।

১) দং সেরেঞ :- ‘দং’ দ হড় হপনাঃ বাপলা আর ছাটয়ৗর অকতে রেয়াঃ সেরেঞ কানা। রাহা রেয়াঃ তাড় লেকাতে নওয়া দং দ আরহ আয়মা হাঁটিতে মেনাঃ আকাদা। জেলেকা- সজহে দং, বুড়হি দং, নেহর দং, ঝিকৗ দং, রামড়া রিৎ দং, বার তাড়াম দং, পে তাড়াম দং আর বালায়া দং এমান। বাপলারে এনেচ্ অকতে রেয়াঃ দং সেরেঞ মা মেনাঃ গে, টুংকি তেন (টাকা চাল) আর সুনুম সাসাং অজঃ অকতে রেয়াঃ দং রেহঁ জুদৗ রাহা মেনাঃ আকাদা।

২) লাঁগড়ে সেরেঞ :- লাঁগড়ে রেয়াঃ দ জাঁহান নেডা মাহা দ বানুঃ আকাদা। পরব পরবাস রেয়াঃ মুচারে বাংখান কামি লাঁগা জিরৗও জহঃ লাঁগড়ে দক সেরেঞা। আতোরে দ মাঝি আখড়ারে লাঁগড়ে এনেচ্ সেরেঞ হোয়োঃ আ। অনাতে আখড়া বন্দনা কাতে এনেচ্ সেরেঞ ক এহবা। কাথা গাবান আর রাহা লেকাতে লাঁগড়ে হুঁ নানা হুনৗর থকতে হাঁটিঞ আকানা। জেলেকা- এতহপ্ লাগড়ে, শিকৗরিয়ৗ লাঁগড়ে, সজহে লাগড়ে আরহুঁ এমান।

৩) দাঁসায় সেরেঞ ঃ দাঁসায় দ গুরু আর চেলা কওয়াঃ দিসম সাঁঘার রেয়াঃ সেরেঞ কানা। সেরেঞ তালাতে গুরুঠেন চেলা কদ কুকলি ক দহয়া আর গুরু দ অনা রেয়াঃ তেলায় এমা। দাঁসায় বঁগা হোয়ঃ হতেতে নওয়া পরব রেয়াঃ তুম হুঁ দাঁসায় হোয় আকানা। দাঁসায় রেয়াঃ দ বারয়া হাঁটিঞ মেনাঃ আকাদা। মিৎ দ ভূওয়ৗং আর মিৎ দ লবয়। ভূওয়াং আতে সেরেঞ লেখান ভূওয়াং সেরেঞ আর লবয় করতাল, টামাক এমানাতে সেরেঞ লেখান অনাদ লবয় ক মেতাঃ আ। ভূওয়াং আর লবয় রেয়াঃ সেরেঞ কদ মিৎ গেয়া;একেন তাড়তেৎ গে ভিনৗ আ। ভূওয়াং সেরেঞ দ ‘হায়রে হায়রে' তাড় আতেক এহবা; মেনখান লবয় দ ‘হৗরি হারি’ তাড় আতে ক এহবা।

৪) সহরায় সেরেঞ :

সানতাড় হপনাঃ জত খনাঃ মারাং সামাজিয়ী পরব দ কানা সহরায়। মারাং হতেতেগে হাতি লেকান পরব কমাকাদা। সহরায় দমড়ে সিঞ মড়ে ঞিদৗ রেয়াঃ পরব কানা। জেলেকা- পাহিল হিলোঃ দ উম, দসার হিলোঃ দ বঁগায়, তেসার হিলোঃ দ খুনটাও, পোনাঃ হিলোঃ দ খুনটি তোৎ আর মড়েয়াঃ হিলোঃ দ কানা জালে। সহরায় পরবরে সহরায় সেরেঞ মা মেনাঃ গে, ডানটা, সাড়পা, গলওয়ার, মাতওয়ার, রিজৗ, লুহরি, গুঁজীর, ডাহার ক সেরেঞা। ডাহার সেরেঞগে আদম করে দ ‘দুরুমজাঃ’ ক মেতাঃ আ।

 ৫) বাহা সেরেঞ :

বাহাদ হড় হপনাঃ ধরম রেয়াঃ পরব কানা। জাহের থানরে নাওয়া গেলে নাওয়া বাহা আতে বঁগা বুরু বধাও ক হোয়োঃ আ। বাহা দপে মাহা রেয়াঃ পরব কানা। জেলেকা- উম, সাঁরদি আর বাহা বাসকে সে জালে। বাহা সেরেঞ রেয়াঃ ছন্দ, কাথা গাবান আর সনদর ধারা দ আঁড়ি মজ অনড়হেঁ লেকাগে আটকারঃ আ। বাহা-ডাহার গে আদম করে দ হুমটি সেরেঞ মেতাঃ আ।

৬) কারাম সেরেঞ :

কারাম দ বঁগা বুরু রেয়াঃ পরব কানা। বিনতি রেয়াঃ কাথা লেকাতে, কীরমু আর ধীরমু অকা লেকারে কারাম গঁসায় কিন মানাও কেদেয়া, অনাগে কারাম রেয়াঃ এতহপ্ দ। কারাম দ পোন লেকাতে হাঁটিঞ আকানা। জেলকা- ক) জিওয়েৎ কারাম, খ) বগা কারাম গ) গুর কারাম, আর ঘ) দিশম কারাম সে দিমুওয়ী কারাম। অনা বেগর, আদম করে দ ডাঁগুওয়ী কারাম আর বুড়হি কারাম হুঁক মেতাওয়াঃ আ। নওয়াক কারাম রেয়াঃ আরিচৗল, বঁগা বুরু আর সেরেঞ দ যুদী যুদী গেয়া। তাড় লেকাতে কারাম দ রিজৗ, লাটবালাং, ভিনসীর এমান মেনাঃ আকাদা।

৭) সেঁদরা সে বির সেরেঞ :

সেঁদরা কারকা সাঁও হড় হপনাঃ সাগাই দ আঁড়িগে সোর আ। সুতৗন টাঁড়ি সে গিপিতিচ্ টাঁড়িরে সিকারিয়ী যাঁহা ক সেরেঞা অনা দবির সেরেঞ ক মেতাঃ আ। সেদায় দ কুড়ি হপন হুঁ নিচল বিররে আড়াঃ সিৎ, সাকাম হেচ্ অকতে বির সেরেঞ ক সেরেঞ এৎ তাঁহেৎ। সেরেঞ রেয়াঃ কাথা করে লাজাও সরম মেনাঃ তে আতো খনাঃ সাহারে, মেতাঃমে বির বুরুরে নওয়া দ ক সেরেঞা আর অনা হতেতেগে জৗনিচ্ বির সেরেঞ ক ঞতুমাকাদা। যাঁহায় নওয়া সেরেঞ ক চারচায়া, ঊনকুদ ‘সিংরৗই’ ক মেতা কওয়া। নাহাঃ দ আদম টঠা করে ‘সিঞ সিংরাই’ ঞুম কাতে আতো তালারে হুঁ বির সেরেঞ রাহা তেক সেরেদো।

৮) পাতা সেরেঞ :

পাতা টাঁড়ি করে যাঁহা ক সেরেঞা অনাগে পাতা সেরেঞ দ। দুলৗড় উইহৗর রেয়াঃ কাথাগে ঢেরতেৎ পাতা সেরেঞ রেদ ঝালকাও আকানা। মিৎ অকতে বাংলা রড় তেই আয়মা পাতা সেরেঞ গাঃ লেনা।

মেনখান চেদাঃ? অনা দ তুলৗ যখায় জারুড় কানা।

(৯) হেড়হৎ সেরেঞ :

খেত বাঁদরে কামি অকতে, আসকায়তে, রহয় দিন জাঁহা ক সেরেঞা অনা কদ হেড়হেং সেরেঞ ক মেতাঃ আ। নওয়া সেরেঞ রেয়াঃ রাহা দ রাঃ এং রদনেৎ লেকাগে আটকারঃ আ। অনাতে হড় গচ্-গুর লেনখান সে ভাঁড়ান অকতে হঁ হেড়হেৎ রৗড়তেক সেরেঞা।

(১০) কাহনি সেরেঞ :

কৗহনি লালাই অকতে তালা তালারে সেরেঞ ক আঁড়তিয়া। অনা রৗড় দ কৗহনি সেরেঞ ক মেতাঃ কানা।

নওয়া বেগর অঝা কওয়াঃ ঝাঁড়নি সেরেঞ এমান মেনাঃ আকাদা। সেদায় দ আরই তিনীঃ লেকা চ সেরেঞ তাঁহেকান অনা দ খদবুঁদ রেয়াঃ লাকতি মেনাঃ আকাদা।

সেরেঞ রেয়াঃ ভেদঃ

আব রেন হাপড়াম ক ক সেরেঞাকাদা

সেরেঞ দম জমাসেম ঞুয়া

সেরেঞ দম লাৎ আসেম রাপাগা

সেরেঞ দ মনে রেগে সিবিলা

সেরেঞ দ সেরেঞ হাপাটিঞ!

 কম কাথাতে সেরেঞ রেয়াঃ ভেদ দ নওয়া খন আর চেৎ হোয় দাড়েয়াঃ আ!

সানতাড়ি হড়-সেরেঞ ক তিস আর অকয়ে গাঃ আকাদা, অনা লৗই দ মুসকিল গেয়া। মেনেক, নিয়ৗ দ সৗরি বাংমা যাঁহায় মিৎ হড়াঃ গাবান দ বাং কানা আর মিৎ অকতে রেয়াঃ হুঁ বাং কানা। মারাং মারাং গুরু খন এহপ্ কাতে গুতি কড়া,কৗড়মি কুড়ি লেকান কওয়াঃ হুঁ গাবান সেরেঞ কানা। নওয়া ক সেরেঞ রেয়াঃ ভাব সে ভেদ বিচার লেখান হড় সেরেঞ কদ আয়মা থকরে হাঁটিঞ গানঃ আ। জেলেকা- ১) সামাজিয়ৗ সেরেঞ, ২) বিনতি সেরেঞ, ৩) বঁগাবুরু সেরেঞ, ৪) নাগাম সেরেও, ৫) খাঁদরি মনে জিয়ন দর্শন রেয়াঃ সেরেঞ, ৬) দুলৗড় রেয়াঃ সেরেঞ এমান।

নওয়া ক মুদ খন মিৎ বার সেরেঞ ইদিকাতে নাসেনাঃ বন গালমারাও লেগে সামাজিয়ৗ সেরেঞ : ছাটিয়ৗর, বাপলা আর ভাঁড়ান- নওয়াক পেয়া আতেগে মানমি জিয়ন। জিয়ন রে মেনাঃ আকাৎ রাঃ-লাঁদা, রৗসকৗ- হমর, ঞাপাম-বাপাগ এমান আরহঁ আডি লেকান আনাটকার। নওয়াক আনাইকৗও গাঃ গাবান কাতে যাঁহাক সেরেঞ তালাতে সদর আকানা, অনাদ সামাজিয়ৗ সেরেঞ বন মেন দাড়েয়াঃ আ

মিৎ টেন নাওয়া গিদরৗ তিনরে নওয়া ধারতি রেয়াঃ পাহিল মারসালে ঞেলা, উনদ অড়াঃ রেন সানাম রাসকৗ তেক লালে চাপে গদঃ আ

সেরেঞাক –

"দুম কেসে দুমেড়ায় মিরু হপন

মিরু হপন হালে কারে হপন।

হেঁও লিতিঞ হো কাকি কারে হপন 

হবর লিতিজ্হো কাকি কারে হপন"

মেনখান মিরু হপন সে কারে হপন দ সারাদিন হেঁও- হবর রে মা বাং কিন তাহেঁন। হারালেন বুরুলেন খানগে হিরলৗ কীকিন হোয়োঃ আ। মেনখান অনাহঁ উনাঃ আলগাতে দ গানঃ তে ? জুদি অড়াঃরে সমল বাং তাহেঁন, জুদি পেড়া বাংকো ঞামঃ! জেলেকা -

মাই এ হারায়েনা পেড়াগে বাং আ

বাবুয় হারায়েনা সমল বানুঃ

মাঝি কোওআঃ ঢিংকি সাড়ে

লুঃ লুটুঃ লুটকু লুটঃ

ইঞীঃ মনে দ লুটুঃ লুটুঃ

মচাতে জাহাঁ কাথা বাং লাইয়োঃ আ, সেরেঞতে অনা সদরঃ আ। নওয়া সেরেঞ দ অনা রেয়া গে

মিটেন সাবুদ কানা।

উমের হোয়লেন খান মিৎদিন নওয়া লিলিবিছি ধারতি হুঁ বাগিয়াঃ হোয়ো : আ। ইনৗ তে জাহাঁ তিনৗঃ গে হড় – হপন কো তাহেঁন, জাহাঁ তিনৗঃ ধন দুরিব তাহেঁন- অকয়ই বায় আঠড়ে দাড়েয়াঃ আ আদম পুরুধুল কো দ অনাতে গিদরৗ ঠেন আকোয়াঃ মনসুবী কো লৗই ওটো কাঃ আ। জেলেকা

ধুতি সাজ কামৗঞ বাবু, দাহড়ি সাজ কামৗঞ

ইঞিঞ গুজুঃ রে দ বাবু, নাইতে ইদিঞমে

নাইতে ইদিঞ রেদ বাবু, তিরয়ো বাবু অরংমে

বাহাম বোহেল রেদ বাবু, মেত্দাঃ জরয় মে। বিনতি রেয়াঃ সেরেঞ ঃ- সানতাড়াঃ বিনতি রেয়াঃ কাথা লেকাতে, পিরথিমি রেন পাহিল উতৗর মৗনমি

দ কানা কিন-পিলচু হাড়াম আর পিলচু বুড়হি। ঊনকিন দ জলা তালারে হাঁস-হাঁসিল চেঁড়েয়াঃ বিলি খন কিন বুঁসাঁড় লেনা নুকিন লাগিৎ তেগে ধারতি তেঁগোয় রেয়াঃ লাগতি হোয় লেনা জেলেকা -

হায় হায় জালাপুরিরে

হায় হায় নুকিন মানওয়া

হায় হায় বুঁসাড় আকান কিন

হায় হায় নুকিন মানওয়া

হায় হায় অকারে দহ কিন?

হায় হায় দুসে লায়ায় বেন

হায় হায় মারাং ঠাকুর জিউ

হায় হায় বুঁসৗড় আকান কিন

হায়হায় নুকিন মানওয়া

হায় হায় অকারে দহকিন??

আদ ধারতি বেনাও এন খান হিহিড়িরে মৗনমিকো বেরেল এনা ওনকো রেন হন- হপন গে বাই বাইতে খজ কামান, হারাতা, সাসাং বেডা, জৗরপি, কাঁদাহারি পারম কাতে মিৎ দিন চামপা দিসম তেকো সেটের এনা। তায়মতে অঁড়ে খনগে সাঁত, শিকৗর, মান, বারহা, ধাড়, দামপাড়া গোটাকো টাপাও কেদা। সেরেঞ মেনাঃ আ

খজ কামান রে বোন খজ লেন,

হিহিড়ি পিপিড়ি রেবোন জানাম লেন 

হারাতা রে বোন হারা লেন 

সাসাং বেড়া রে বোন জৗতেনা হো !

চামপারে দ়, বাংমা, আডি জুগ কো তাহেঁকানা গেলবার পারিস রেন হড় গেল বার গটেচ্ গাড় কো বেনাও আন তাহেঁ । মেনখান অনাকো লিলিবিছি, লিখন গড়হন গাড় এটাঃ কো ঠেন কো রেচ্ ওচো আকানা। দায়াগে ওনকোওয়াষ  হিডির হিডির মেৎদাঃ লিগি আকানা, নিতহঁ অনাদ সেরেঞরে মেনা আ

চামপা গাড় দ লিলিবিছি

দায়াগে চামপা বাদোলি কয়ডা

দায়াগে গাড় বন বাগিয়াদা!

বাদোলি কঁয়ডা লিখন গড়হন! মেনখান নওয়াকো গাড় সে দিসম দ তিস আর অকারে তাহেঁকানা অনা দ খদবুঁদ কাতে ঞেল রেয়াঃ নাগাম রেয়াঃ সেরেঞ :

লাগতি মেনাঃ আকাদা

হড় হপন দ আডি মারে জীব কানাব। মেনখান অল দহ নাগাম দ বানুঃ আকাৎ তাবনা। দিসমরে হিন্দু জুগ, বৌদ্ধ জুগ, মুসলৗ জুগ, ইংরেজ জুগ এমান তিনৗঃ জুগ হেচ্ আকানা সেন আকানা, হটঃ সোরতে তিনৗঃ কাঁপি খাঁড়া ঝালকাও আকানা এনই আবদ জিওয়েৎগে মেনাঃ বোনা, নওয়াগে সাঁউকারি রেয়াঃ কাথা দ । মেনখান নওয়া লাগিৎ হুল সে লৗড়হাই হঁ কম দ বাং হোয় আকানা।সেরেঞগে অনারেন সৗখি দ। জেলেকা সানতাড় হুল রেয়াঃ মিটান সেরেঞ দ নংকা –

উসাস বন অওয়ার বন

চিলি হুঁ বাংকো তেগোন

তবে দ বোন হল গেয়া হো ।

দিশম দিশম দেশ মাঝি, পারগানা

আতো আতো মাপাজি কো 

দুঃ বোন দানাং বোন বাংগেকো তেঁগোন

তবে দ বোন হল গেয়া হো।।

আরো দিসম রেন পৗহিল উতৗর মায়াম গোহা (শহীদ) দ কানায় ভাগলপুর রেন তিলকৗ মুরমু(১৭৮১)। অনা কাতে সিদু-কানহু তিকিনাঃ আয়ুরতে সানতাড় হুল (১৮৫৫), দিনাজপুরেন জিতু সানতাড়াঃ হুল, খেরওয়াড় আন্দোলন (১৮৭১), তেভাগা আন্দোলন আর ১৯৪২ রেয়াঃ ভারত ছাড়ো আন্দোলনরে আয়মা সানতাড় জিউয়ি কো আলায় লেদা ১৯০৮ সালরে ভালুকবিধা রেন ডমন হেম্বরম দ বিপ্লবী ক্ষুদিরাম বসুরেন বর্মা ততল গাতেয় তাহেঁকানা আর পুলিশ ঠেনে দাল গচ্ ওচো লেনা। ৭০ দশক রেয়াঃ নকশাল আন্দোলন আর বাংলাদেশ রেয়াঃ মুক্তিযুদ্ধ রেই আয়মা সানতাড় জিউয়ি কো এম আকাদা নওয়া ক হুল ইদি কাতে আয়মা সেরেঞ গাবান লেনা। মেনখান তুমৗল দহ বাংতে আমদা আৎ চাবা আকানা। গাহির হুদিস সে জিয়ন দর্শন রেয়াঃ সেরেঞ :

হড় হপন দ বির বুরু, গাড়া মুডু তালারে তাঁহেন হড়। অনা লেকারে সিরজন (প্রকৃতি)সাঁও আকোআঃ সাগাই দ আড়িতেৎ সোর আ। দিশম আচুরঃ কান বিহুরঃ কান রেয়াঃ সিখনৗত দ সিরজন খন গে কো বাড়ায় ঞাম আকাদা। জেলেকা –

হেসাঃ মা চটেরে, জা গোঁসায় !

তুদে দয় রাগে কান

বাড়ে মা লাওয়েররে, জা গোঁসায় ! গুতরুৎ মে দয় সাঁহেদা।

দেস চ আঁচুরেন, জা গোঁসায় !

তুদে দয় রাগে কান

দিসম চ বিহুরেন, জা গোঁসায়

গুতরুৎ মে দয় সাঁহেদা।-----

থুকুম । নিত লেকা অনা পাহটা দ তাহেঁ ওচো

মুচৗৎ রেয়াঃ কাথা ঃ

সাঁওহেৎ রেয়াঃ বিচৗরতে নওয়া হড়- সেরেঞ রেয়াঃ গনং দ আঁড়িগে বাঁড়তিয়া। আদম আদম সেরেঞ রেদ অনড়হে লেকা আঁড়ি চেতান থক রেয়াঃ ছন্দ, মাত্রা আর অলংকার বেওহার আকানা । জেলেকা ‘গর’ মেসা কাতে কাথা কুঁদৗউ আকানা – পোঁডেগর সাদম, তড়ের পুখুরি, বাহাগর বাঁদেলা, ধুবিগর ঘাঁস, অভেগর হাসা এমান। অনকাগে বাহা সেরেঞরে ‘সমার্থক সাবাদ রেয়াঃ বেওহার আঁড়ি ঢের মেনাঃ আকাদা। জেলেকা – আচুরে বিহুরে, হররে ডাহাররে, ঞিদৗয়রে ঞুতৗৎরে, গুতুয়ালাং গালাং আলাং এমান। আদম সেরেঞ দ রূপক লেকাতেই গাঃ গাবান আকানা ।

দুক রেয়াঃ কাথা নওয়া ক সেরেঞ দ বাই বাইতে আৎ ইদিঃ কানা। যাঁহাক মেনাঃ রেই বাঁখেড় জখান মিৎ বার কাথাক হানতে নাতেঃ কানা। নংকা কাতে সেরেঞ রেয়াঃ মানেগে এটাঃ চালাঃ কানা। যেলেকা আদম হড় বাহা ক সেরেঞা

‘তেহেঞ দ নায়কে ঝৗনটি রেগেয় গিতিচ্ লেন ঝানটি রেগেয় গিতিচ্ নিয়ৗড়ো লেন....

নডে ঝৗনটি বদলতে ‘জীটি’ রেগেয় গিতিচ্ লেন হোয়োঃ আ। '‘জীটি’ রেয়াঃ মানে দ হোয়োঃ কানা -পাটিয়ৗ।

কাথারে মেনাঃ আ -- রড়াঃ গে রৗড়ঃ আ। রৗড় লেন আঁনিগে সেরেঞ রেয়াঃ সিবিল দ ঞামঃ আ। মেনখান রৗড় সুমুংদ বাং, ভাব সে ভেদ তাঁহেন আনিচ্ সেরেঞ দ ঢের দিন জিওয়েৎ তাঁহেনা। সানতাড়ি হড় সেরেঞ রেই অনা গুন মেনাঃ তেগে যুগযুগ জিওয়েৎ মেনাঃ আকাদা।

আয়মা উইহৗর ভাবনা কাতে আবরেন আদম সুবুদিয়ৗ দ নওয়া ক সেরেঞ তুমৗল কাতে উছৗন রেয়াঃ ক কুরুমুটু আকাদা। মেনখান এনতেহঁ নিতহঁ আয়মা সেরেঞ দানাং রেগে তাঁহেয়াকানা। নওয়া ক জগাও দহ লাগিৎ সানাম ক উইহৗর ভাবনায় লাকতি কান তাবনা।